Wednesday, January 11, 2012

၂၀၁၂-နှင့် မြန်မာနိုင်ငံ ဆိုင်ရာ သုတေသန။ အပိုင်း (၂)

မြန်မာ နိုင်ငံ ဇာတာ ၂-မျိုး။
(နိုင်ငံရေး ဗေဒင် နှင့် မိုးတား ၏ ရပ်တည်ချက် တို့ကို “၂၀၁၂-နှင့် မြန်မာနိုင်ငံ ဆိုင်ရာ သုတေသန။ အပိုင်း (၁)” တွင် ဖတ်ရှု နိုင်ပါသည်။)

နောက်ပါ ယှဉ်တွဲ ဆန်းစစ်ချက်များတွင်- လက်ရှိ အများလက်ခံထားကြသော ဇန်န၀ါရီလ ၄-ရက်၊ နံနက် ၄း၂၀ ဇာတာအား “အလံတင်၊ အလံချ ဇာတာ” ဟု အမည်ပေးမည် ဖြစ်ပြီး၊ လွတ်လပ်ရေး ကြေညာ စာတမ်း အက်ဥပဒေ အရ၊ ဇန်န၀ါရီလ ၄-ရက်သို့ ရောက်ရောက်ချင်းကာလ၊ တစ်နည်းအားဖြင့် ၃-ရက်နေ့ ည ၁၂-ဇာတာ အား “လွတ်လပ်ရေး ဥပဒေ ဇာတာ” ဟု - စာဖတ်သူများ ခွဲခြား နိုင်အောင် အမည်ပေးထားမည် ဖြစ်ပါသည်။

နိုင်ငံ အတွက် အရေးအကြီးဆုံး ကိစ္စ တစ်ခုဖြစ်သဖြင့်- ပထမဆုံး လွတ်လပ်ရေး အခမ်းအနားကို မင်္ဂလာ အချိန်ကို- ရွေးချယ် သတ်မှတ်ပေးခဲ့သည့် မြန်မာ နက္ခတ် ပညာရှင်ကြီးများ၏ စေတနာ နှင့် အားထုတ်မှု အကြောင်းကို မြန်မာ နက္ခတ် ပညာရှင်ကြီးများ အယူအဆ။ (၂) မြန်မာ့လွတ်လပ်ရေး ဇာတာ  ဆောင်းပါးတွင် ဖေါ်ပြခဲ့ပြီး ဖြစ်ပါသည်။ အောက်တွင် ဖေါ်ပြထားသည်မှာ-လွတ်လပ်ရေး ကြေညာ စာတမ်း အက်ဥပဒေ အရ- မြန်မာ နိုင်ငံအား- 

(1) “On the appointed day, Burma shall become an independent country, neither forming part of His Majesty's dominions nor entitled to His Majesty's protection”. “သတ်မှတ်ထားသော နေ့တွင်၊ မြန်မာနိုင်ငံသည်- အင်္ဂလန် ဘုရင် မင်းမြတ်၏ ဒိုမီနီယမ် နိုင်ငံ အနေဖြင့်သော်လည်းကောင်း၊ ဘုရင် မင်းမြတ်၏ အကာအကွယ် ပေးမှု အောက်တွင် လည်းကောင်း မရှိစေရပဲ- လွတ်လပ်သော နိုင်ငံ အဖြစ်သို့ ရောက်ရှိစေရမည်။”
ဟု ဖေါ်ပြထားကာ-
ထိုသတ်မှတ်သော နေ့- မည်သည့် နေ့ ဖြစ်သည် ဆိုသည်ကိုလည်း- ဥပဒေ အပိုဒ် (၂) အရ- 

“In this Act, the expression "the appointed day" means the
fourth day of January, nineteen hundred and forty-eight”- “ယခု ဥပဒေ အရ- သတ်မှတ်ထားသော နေ့၏ ဖွင့်ဆိုချက်သည်- ၁၉၄၈-ခုနှစ်၊ ဇန်န၀ါရီလ ၄-ရက် ဖြစ်သည်။”
ဆိုလိုသည်မှာ- အလံတင် အလံချ အခမ်းအနား လုပ်သည် ဖြစ်စေ၊ မလုပ်သည် ဖြစ်စေ၊ အမြောက်ဖေါက်၊ ဗြောက်အိုးဖေါက်ပြီး- ပျော်ပွဲ ရွှင်ပွဲ လုပ်သည် ဖြစ်စေ- မလုပ် သည် ဖြစ်စေ- - ၁၉၄၈-ဇန်န၀ါရီလ ၄-ရက်သို့ မြန်မာ စံတော်ချိန် အရ စက္ကန့် စွန်းလျှင် စွန်းချင်း- ဗြိတိသျှ တို့အနေဖြင့် - မြန်မာ နိုင်ငံအား လုံးဝ အုပ်ချုပ်ခွင့် မရှိတော့ပဲ- မြန်မာများ ကိုယ့် ကြမ္မာ ကိုယ်ဖန်တီးခွင့်ကို- ထိုအချိန်မှပင် စတင်ရရှိပြီ ဖြစ်သည်။

လက်ရှိ ဖြစ်ပြီးခဲ့သော ဖြစ်ရပ်များ အရ- ထိုဇာတာ ၂-ခုစလုံးကို ဘက်မလိုက်ပဲ- မူအတူ၊ စစ်ဆေးနည်း အတူဖြင့် အောက်ပါ ဖြစ်ရပ်များကို စစ်ဆေးကြည့်ကြပါစို့။
  • မြန်မာနိုင်ငံ တွင် ဗုံးပေါက်ကွဲခဲ့သော ဖြစ်ရပ်များ။
  • မြန်မာနိုင်ငံ တွင် နိုင်ငံရေး အပြောင်းအလဲ ထင်ရှားသော ဖြစ်ရပ်များ၊
  • မြန်မာနိုင်ငံ တွင် ငလျင်ကြီးများ လှုပ်ခဲ့သော ဖြစ်ရပ်များ။
  • မြန်မာနိုင်ငံ တွင် မီးဘေး ကြုံခဲ့သော ဖြစ်ရပ်များ။
  • မြန်မာနိုင်ငံ တွင် လေမုန်တိုင်းဘေး ကြုံခဲ့သော ဖြစ်ရပ်များ။
  • မြန်မာနိုင်ငံ တွင် ရေဘေး ကြုံခဲ့သော ဖြစ်ရပ်များ။
  • မြန်မာနိုင်ငံ တွင် လေယာဉ်ပျက်ကြခဲ့သော ဖြစ်ရပ်များ။
  • မြန်မာနိုင်ငံ တွင် ရေကြောင်း အန္တရယ် များ ပေါ်ပေါက်ခဲ့မှုများ။
ဗုံးပေါက်ကွဲ မှုများနှင့် မြန်မာ နိုင်ငံ ။

အီရတ် ကဲ့သို့သော နေ့စဉ် အကြမ်းဘက်မှု ဖြစ်ပွားသော နိုင်ငံမဟုတ်သကဲ့သို့၊ ယခင်က တမီလ် ပြောက်ကျားများ၊ အိုင်အာအေများ၊ အယ်လ်ခိုင်ဒါ များ၊ ထိုင်းနိုင်ငံကဲ့သို့ တောင်ပိုင်း ခွဲထွက်ရေး သမားများ မရှိသော မြန်မာ နိုင်ငံသည်- ဗုံးပေါက်ကွဲမှုများ တွင်တော့ သိပ်ပြီး တော့ ခေတ်နောက် မကျန်ခဲ့ပါချေ။ အောက်တွင် ဖေါ်ပြထားသည်က ယခု အချိန်အထိ သိရှိစုဆောင်း ထားသမျှသော မြန်မာ နိုင်ငံ ဗုံးပေါက်ကွဲမှု မှတ်တမ်း ဖြစ်၏။
ဆက်လက် ဖေါ်ပြထားသည်က- ထိုဖြစ်ရပ်များ ဖြစ်ချိန်တွင် ကောဇာ ဂြိုဟ်တို့ တည်နေပုံ အနေအထား ဖြစ်၏။
ဟုတ်ပါပြီ။ ယခု အခါ ဇာတာ ၂-စောင်နှင့် နှိုင်းယှဉ်၍ ဆန်းစစ်ကြည့်ကြပါအံ့။

အလံတင် အလံချ အခမ်းအနား ဇာတာ (အများလက်ခံထားသော ဇာတာ)- နံနက် ၄း၂၀ နှင့် ဗုံးပေါက်ကွဲမှုများ။
ဤ ဇာတာ အရ ဆိုပါလျှင်- မြန်မာပြည်၏ ဘွားဒဿာ သည် အင်္ဂါ ထူလ၊ ရာဟု ပြတန္တရ နှင့် စနေ အန္တရ အခါ ဖြစ်ကာ- အင်္ဂါသည် ၆-တန့် သခင် ဖြစ်သည်မှာလည်း မှတ်သားဘွယ်ပင် ဖြစ်ပါ၏။ ဘွား ဒဿာ နှင့် ဘာဝ အချို့ ထိခိုက်မှု ရှိနေသော်လည်း- စနေ နှင့် သောကြာ မှ လွဲ၍ အခြားဂြိုဟ်များ အင်အား အလွန်ကောင်းသော အနေအထားကို ယူထားသည် ဖြစ်၍- ကောင်းသော ဇာတာ တစ်စောင် ဟု ဆိုရပါမည်။ အဖြစ်နိုင်ဆုံး အနေအထားထဲမှ အကောင်းဆုံး အချိန် တစ်ခုကို- ကွန်ပျူတာ အကူအညီ မပါပဲလျှက်- ရွေးချယ်ပေးခဲ့သော မြန်မာ ပညာရှင်ကြီးများအား ဦးညွတ် လိုက်ရပါ၏။
ယခု အခါ - အထက်ပါ မင်္ဂလာအခါ ဇာတာ မူလ ဇာတာပေါ်တွင် - ဗုံးပေါက်ကွဲသော ဖြစ်ရပ်များ နှင့် ယှဉ်တွဲ၍- တစ်ပြိုင်နက် တွက်ချက် လိုက်ပါသည်။ ဖေါ်ပြပါ ဇယားသည်- ဂြိုဟ်များ အနေဖြင့် အပူးအမြင် အားဖြင့်- လွှမ်းမိုးမှု ကို မူတည်၍- နီးစပ်လျှင် ပမာဏ များကာ။ ၁-ဒီဂရီ အတွင်း ဆိုပါက- ၁၀၀% ဖြစ်ပြီး၊ ၅-ဒီဂရီ ဆိုပါက ၆၀% ဖြင့် လွှမ်းမိုးမှု ပမာဏများ အရ တွက်ချက်ထားခြင်း ဖြစ်သည်။ ၅-ဒီဂရီ ထက် ပို၍ ကွာဝေးမှု များကို ထည့်မတွက်ပါချေ။ ဂြိုဟ်ဆိုး ဆိုသည်မှာ ၆-တန့်၊ ၈-တန့်၊ ၁၂-တန့် တို့၏ မူလတြိဂေါဏ အိမ်ရှင်များ နှင့် ရာဟု၊ ကိတ် တို့ကို ဆိုလိုခြင်း ဖြစ်သည်။ မိုးတား အခြေခံ ဆောင်းပါး  နှင့် ဆက်စပ် ကြည့်နိုင်ပါသည်။

မိုးတား နည်းသည်- စနေ၊ အင်္ဂါတိုင်းကို အမြဲဆိုးသည်ဟု မယူဆပဲ၊ ဒုဌာန ဘာဝ သခင်ဖြစ်မှ ဆိုးသည်ဟု ယူခြင်း၊ ၂-တန့်၊ ၇-တန့် ဘာဝများကို မာရက သခင်ဟု မယူခြင်း၊ ဂြိုဟ်တစ်လုံး အနေဖြင့် ၂-ရာသီ ပိုင်ဆိုင်မှုတိုင်းကို - အသုံးမပြုပဲ- မူလတြိဂေါဏ အိမ်ရှင် အနေဖြင့်သာ ယူခြင်းများကိုသာ အဓိက အသုံးပြုပါသည်။
ဂရပ်နှင့်- အထက်ပါ ဇယားငယ် ၏ ဆိုလိုရင်းမှာ- ထိုကဲ့သို့ ဖြစ်ပွားခဲ့သော ဖြစ်ရပ်များတွင်- မူလ တနင်္ဂနွေ အား ကောဇာ ဂြိုဟ်ဆိုးများ၏ နီးစပ်စွာ လွှမ်းမိုးမှုက- ၃၀% (စုစုပေါင်း ဖြစ်ရပ် ၁၀ ကြိမ်တွင် ၃-ကြိမ်) ရှိ၏။ မူလ တနင်္လာအား ကောဇာ ဂြိုဟ်ဆိုးများ၏ နီးစပ်စွာ လွှမ်းမိုးမှုမှာ ၇၀% (စုစုပေါင်း ဖြစ်ရပ် ၁၀ ကြိမ်တွင် ၇-ကြိမ်) ရှိ၏ ဆိုသည်ကို ပြခြင်း ဖြစ်၏။

ဤဇာတာ အရအားဖြင့်- ထိုဗုံးပေါက်သော နေ့များတွင်- အကြိမ် အရေ အတွက် အားဖြင့် အများဆုံး ခံစားရသော ဂြိုဟ်တို့မှာ- တနင်္လာ နှင့် စနေ ဖြစ်၏။ ၄င်းတို့သည် မူလပရိယာယ်- သဘာဝ တာဝန်အားဖြင့်- ပြည်သူလူထု၊ လက်လုပ်လက်စား လူတန်းစားများကို ဖေါ်ပြသော ဂြိုဟ်သဖြင့် ကိုက်ညီ မှန်ကန်နေ၏။ သို့သော်- တနင်္လာသည်- ဤဇာတာ အရ ၉-တန့် သခင်ဖြစ်၍၊ စနေသည် ဤဇာတာ အရ- ၄-တန့် သခင် ဖြစ်၏။

၉-တန့် သခင် အနေဖြင့် တာဝန်ယူသော- “ဘုရား၊ ကျောင်းကန်၊ ဗလီ၊ ဘုရားကျောင်း စသော ဘာသာရေး အဆောက်အဦများ၊ တရားရေး ဆိုင်ရာ စနစ် နှင့် စာရိတ္တပိုင်း ဖြောင့်မတ်မှု။ သံတမာန် ဆိုင်ရာ ကိစ္စများ၊ တိုးတက် မှုများ၊ နိုင်ငံခြား ပညာသင် ပို့လွှတ်မှုများ။” အနေဖြင့် လည်းကောင်း၊

၎-တန့် သခင် အနေဖြင့် တာဝန်ယူသော “စာသင်ကျောင်း၊ စသည့် ပညာရေး အဖွဲ့အစည်းများ၊ နိုင်ငံတော် မြေယာ ကဏ္ဍ၊ ကုန်သွယ်ရေး နှင့် စိုက်ပျိုးရေး။ လူထု အုပ်စု၊ သဘာဝ သယံဇာတ၊ သတ္တုတွင်း၊ ငြိမ်းချမ်း သာယာ အေးချမ်းမှု၊ နိုင်ငံရေး တည်ညိမ်မှု။” များ အနေဖြင့် တိုက်ရိုက် ထိခိုက်မှု မရှိခြင်း ကို သိနိုင်၏။
ဆက်လက်၍- ထိုရက်ကာလများတွင် ကောဇာ ဂြိုဟ်ဆိုးများက- မူလ ဘာဝများအား လွှမ်းမိုးထား မှုကို လေ့လာ လိုက်သော အခါ အောက်ပါ အတိုင်း တွေ့ရပါ၏။
ကောဇာ ဂြိုဟ်ဆိုးများက- မူလ ဘာဝများ၏ အလယ်မှတ် တို့အား လွှမ်းမိုးထား မှုကို လေ့လာ လိုက်သော အခါ ထူးခြားသော အနေအထား မတွေ့ရပါတော့ချေ။ အားလုံးသည် မျှနေသော သဘောဖြစ်၍- ဘာဝ အချို့ အနေဖြင့် အထူးတလည် သတ်သတ်မှတ်မှတ် ထိခိုက်ခြင်း မရှိရသည်ကို သတိပြုမိနိုင်၏။
မပြီးသေးပါချေ။ ပြည့်စုံ နိုင်သမျှ ပြည့်စုံစေရန် ဆက်လက်၍- ဖြစ်ရပ်များ ဖြစ်ပွားခဲ့သော ဒဿာများကို လေ့လာ၍- မည်သည့် ဒဿာများတွင် ဖြစ်ပွားခဲ့သနည်းကို လေ့လာကြည့်ပါစို့။
ဒဿာ တို့ကို လေ့လာလိုက်သော အခါ-
ဤကဲ့သို့ ဗုံးပေါက်ကွဲမှုများကို ဒဿာ စနစ်ဖြင့် လေ့လာလိုက်သော အခါ- စနေ ထူလ ဒဿာ နှင့် စနေ ပြတန္တရ ဒဿာ သည် အထင်ရှားဆုံး ဖြစ်၏။ တစ်နည်းအားဖြင့် စနေသည် ဤဇာတာ အရ- ၄-တန့် ဘာဝ၏ မူလတြိဂေါဏ သခင်လည်း ဖြစ်၏။ စနေ ၏ သဘာဝ ပရိယာယ် နှင့် ၄-တန့် သခင် အဖြစ် တာဝန် ယူထားရသော ကာရက အဓိပ္ပါယ်ကို ပြန်ကြည့်လိုက်ပါ။ စနေသည်- “နိုင်ငံတော် အောက်ခြေ၀န်ထမ်းများ၊ ဆင်းရဲသူ လူတန်းစားများ၊ အောက်ခြေ လုပ်ငန်းများ နှင့် သတ္တုတွင်း တူးဖေါ်ရေးများ၊ ဥပဒေ ထိမ်းသိမ်းရေး ဆောင်ရွက်ရသူများ၊ အသက်အရွယ် ကြီးရင့်သူများ၊ အများပြည်သူပိုင် အဆောက်အဦများ၊ ရှေးဟောင်း အမွေအနှစ်များ။” ကို တာဝန်ယူ၍- ၄-တန့် သခင် အဖြစ်ဖြင့်- “စာသင်ကျောင်း၊ စသည့် ပညာရေး အဖွဲ့အစည်းများ၊ နိုင်ငံတော် မြေယာ ကဏ္ဍ၊ ကုန်သွယ်ရေး နှင့် စိုက်ပျိုးရေး။ လူထု အုပ်စု၊ သဘာဝ သယံဇာတ၊ သတ္တုတွင်း၊ ငြိမ်းချမ်း သာယာ အေးချမ်းမှု၊ နိုင်ငံရေး တည်ညိမ်မှု။” ကို တာဝန်ယူ၏။
သဘာဝ ကျ တိုက်ဆိုင်မှု ရှိမရှိ ကိုယ်တိုင် ဆုံးဖြတ်ပါ။

တစ်ဖန်- အန္တရ ဒဿာ အရ အထင်ရှားဆုံး ဖြစ်နေသော သောကြာ အန္တရကို လေ့လာပါဦး။ အလံတင် အလံချ မြန်မာ နိုင်ငံ ဇာတာ အရ- ဗုံးပေါက်ကွဲမှုများသည် သောကြာ အန္တရတွင် အများဆုံး ဖြစ်၏။
သောကြာ၏ သဘာဝ တာဝန် - ဂြိုဟ် ပရိယာယ်အရ- “နိုင်ငံတော် အရင်းအမြစ်များ၊ ဟော်တယ် နှင့် ခရီးသွားလာရေး လုပ်ငန်းများ၊ ရုပ်ရှင် နှင့် အနုပညာ လုပ်ငန်းများ၊ အနုပညာရှင်များ၊ ဖျော်ဖြေရေး လုပ်ငန်းများ၊ ကလေးသူငယ် မွေးဖွားမှုများ၊” ဖြစ်၏။ သောကြာသည် အဆိုပါ ဇာတာ အရ- ၁၂-တန့် ဘာဝ သခင် ဖြစ်ပြီး- ၁၂-တန့် သခင်၏ တာဝန်မှာ- “ငွေကြေး ဆုံးရှုံးမှုများ၊ နိုင်ငံတော် အသုံးစရိတ်၊ မှောင်ခို စသော လျှို့ဝှက် ရာဇ၀တ်မှုများ၊ ဆေးရုံ၊ စစ်ရေး နှင့် ဆုံးရှုံးမှုများ” ဖြစ်၏။
ကောင်းပါပြီ။ ယခု- စစ်ဆေးခဲ့သော ဥပဒေများ အတိုင်း- အခြား ဇာတာကိုလေ့လာကြပါစို့-

လွတ်လပ်ရေး ဥပဒေ ဇာတာ- နံနက် ၀း၀၀ နှင့် ဗုံးပေါက်ကွဲမှုများ။
ဤဇာတာ အရအားဖြင့်- ထိုဗုံးပေါက်သော နေ့များတွင်- စနေဂြိုဟ်သည် အားလုံးသော ဂြိုဟ်တို့ အနက် ထင်ထင်ရှားရှား- တိုက်ခိုက် ဖျက်ဆီးခြင်း ခံရသည်ကို တွေ့ရတော့၏။ မူလပရိယာယ်- သဘာဝ တာဝန်အားဖြင့်- ပြည်သူလူထု၊ လက်လုပ်လက်စား လူတန်းစားများကို ဖေါ်ပြသော ဂြိုဟ်သဖြင့် သဘာဝ တာဝန်- မူလဂြိုဟ် ပရိယာယ် အားဖြင့်- ကိုက်ညီ မှန်ကန်နေ၏။ ဆက်ကြည့်ပါဦး။

စနေဂြိုဟ်သည် ဤဇာတာ အရ- ၆-တန့် သခင် အနေဖြင့် တာဝန်ယူသောကြောင့်- “နိုင်ငံတော် တည်ငြိမ်မှု၊ အမှုအခင်း ဖြစ်ပွားမှု၊ မတော်တစ်ဆမှုများ၊ ထိခိုက်မှုများ။ ရန်သူ၏ တိုက်ခိုက်မှု။” အနေဖြင့် အာရီ ဘာဝ သခင်ကို တိုက်ခိုက် ခံရခြင်းဖြင့်- အမှုအခင်း၊ ထိခိုက်မှု၊ တိုက်ခိုက်မှု ဖြစ်ခြင်းကို မြင်ကြရပါ၏။
ဆက်လက်၍- ထိုရက်ကာလများတွင် ကောဇာ ဂြိုဟ်ဆိုးများက- မူလ ဘာဝများအား လွှမ်းမိုးထား မှုကို လေ့လာ လိုက်သော အခါ အောက်ပါ အတိုင်း တွေ့ရပါ၏။ ထိုအခါ- ၁-တန့်၊ ၇-တန့်၊ ၁၀-တန့် တို့၏ အလယ်မှတ် များကို ထင်ရှားစွာ ဖျက်ဆီးခံရခြင်းကို မြင်ရ၏။
တိုင်းပြည်တွင် ထိခိုက်မှု သဘောကို ထင်ရှားစွာ ပိုမြင်လာရ၏။
ဆက်လက်၍- ထိုရက်များတွင် မည်သည့် ဘာဝ တို့သည် အကြိမ် အရေအတွက် များပြားစွာ ထိခိုက်နေသနည်း ကို လေ့လာသောအခါ- ၁-တန့်၊ ၇-တန့် နှင့် ၁၀-တန့် တို့ကို ထင်ရှားစွာ ထိခိုက်ခြင်း ခံရ၏။ ၁-တန့်ဘာဝ ခေါ် လဂ်သည်- “တစ်တိုင်းပြည်လုံး၏ ယေဘူယျ အခြေအနေ၊ ပြည်သူလူထု ကျန်းမာရေး။ အုပ်ချုပ်မှု အနေအထား။ နိုင်ငံတော် တည်ညိမ်မှု၊ နိုင်ငံတော် အစိုးရ၏ ဂုဏ်သိက္ခာ၊ ကမ္ဘာမှ သတ်မှတ်သည့် အဆင့်အတန်း။” ကို ဖေါ်ပြ၍၊ ၇-တန့် နှင့် ၁၀-တန့် တို့သည် “စစ် နှင့် နိုင်ငံတကာ ဆိုင်ရာ ဆက်ဆံရေး၊ နိုင်ငံတကာ သဘောတူညီမှုများ။ ဟော်တယ် နှင့် ခရီးသွားလာ ရေး လုပ်ငန်းများ၊” ကိုလည်းကောင်း၊ “နိုင်ငံ၏ မြင်သာသော ကံကြမ္မာ။” ကိုလည်းကောင်း ဖေါ်ပြနေ၏။
တန်းတူ စစ်ဆေးခြင်း ဖြစ်၍- ထိုဗုံးပေါက်ကွဲမှုများ ဖြစ်ခဲ့သော ဒဿာ ကာလများကိုပါ ဆက်ကြည့်ကြပါစို့။
စနေထူလ ဒဿာ ကာလတွင် ဗုံးပေါက်ကွဲမှု အများဆုံး ဖြစ်ခဲ့၏။ စနေသည် ဤဇာတာ အရ အာရီဘာဝ ဖြစ်သော ၆-တန့် သခင် ဖြစ်ခြင်းကြောင့်- “နိုင်ငံတော် တည်ငြိမ်မှု၊ အမှုအခင်း ဖြစ်ပွားမှု၊ မတော်တစ်ဆမှုများ၊ ထိခိုက်မှုများ။ ရန်သူ၏ တိုက်ခိုက်မှု။” ကို ဖေါ်ပြနေသည်မှာ ထင်ရှား၏။
သုတေသန တစ်ခုကို ဖြစ်သလို ကောက်ချက်မဆွဲမိစေရန် အတွက် ပြည့်စုံစေရန်- ဆက်ကြည့်လိုက်ပါဦး။
သောကြာ နှင့် ကိတ် အန္တရဒဿာ ကာလများ၊ သောကြာ ပြတန္တရများတွင်လည်း ဗုံးပေါက်ကွဲမှု အဖြစ်များသည်ကို တွေ့ရ၏။ ကိတ်သည်- “လောကုတ္တရာ ကိစ္စရပ်များ၊ လောကီ စည်းစိမ် များ ပျက်စီးခြင်း၊ ဆုံးရှုံးခြင်း၊ မတော်တစ်ဆ ဖြစ်ရပ်များ။” များကို ဖေါ်ပြနေခြင်း၊ သောကြာသည်- “ဖျော်ဖြေရေး လုပ်ငန်းများ၊ ပွဲလမ်း သဘင်များ၊” ကို ဖေါ်ပြနေခြင်း ဖြစ်သည်ကိုတွေ့ရ၏။
(ဆက်လက်၍- အရေး အခင်း များနှင့် မြန်မာ နိုင်ငံ သုံးသပ်ချက်ကို တင်ပြပါမည်။)

(နိုင်ငံရေး ဗေဒင် နှင့် မိုးတား ၏ ရပ်တည်ချက် တို့ကို “၂၀၁၂-နှင့် မြန်မာနိုင်ငံ ဆိုင်ရာ သုတေသန။ အပိုင်း (၁)” တွင် ဖတ်ရှု နိုင်ပါသည်။)

[+/-] show/hide this post

No comments:

Post a Comment