Wednesday, June 29, 2011

ဘင်ဂျမင် ဖရန်ကလင်။ (အပိုင်း ၂) အင်းပညာ နှင့် ဖရန်ကလင်

ယခင် ပို့စ်တွင် အမေရိကန် လွတ်လပ်ရေး ဘခင် ဘင်ဂျမင် ဖရန်ကလင်။ (အပိုင်း ၁) ကို ရေးသား တင်ဆက်ခဲ့ပါသည်။ ယခု တင်ဆက် မည်ကား အများတကာထက် ထူးခြားသော သင်္ချာပညာကို ဖေါ်ထုတ်ထားသည့် ဘင်ဂျမင်၏ အင်းပညာ ဖြစ်ပါသည်။ အင်းပညာ ဟု ဆိုရာတွင်- မြန်မာများ သိထားကြသော မြန်မာ အင်းများ အနက်မှ “အဘယ ဇာတက အင်း” နှင့် ယှဉ်၍ ရေးသား ဖေါ်ပြပေးမည် ဖြစ်ပါသည်။

မြန်မာ့ ရှေးဟောင်း အင်းပညာရပ်များ၏ လေးနက်ပုံကို ညီငယ် တစ်ဦး ဖြစ်သူ မောင်အုပ်စိုးမှ သူ၏ ဆိုက် တွင် ရေးသားဖေါ်ပြထားခဲ့ပါသည်။ အင်းပညာသည် သင်္ချာပညာ နှင့် ၀ိဇ္ဇာပညာရပ်များ အချိုးကျ ပါဝင်နေလေရာ- အနောက်တိုင်း ပညာရှင်တို့သည် လည်း သူတို့နည်း သူတို့ဟန် ဖြင့် အင်း အတတ်ပညာများ ရှိခဲ့ကြပါ၏။

မြန်မာ့ရိုးရာ “အဘယ ဇာတက အင်း” ကို ကြည့်မည် ဆိုပါက - အောက်ပါ အတိုင်းတွေ့ကြရပါမည်။

---- အစကြိုးကြာ၊ ဆယ့်ခြောက်ခါနှင့်၊ ဟင်္သာကိုးဖြစ်၊ ခြောက်ဖြစ်ကားခို၊ ကျီးညို သုံးခါ၊ သံသာကျူးထိပ်၊ ကရ၀ိက် ငါး၊ လေးကားကိန္နရီ၊ စာမရီဆယ့်ငါး၊ မျောက်ကားတဆယ်၊ ဆင်ဝယ်ဆယ့်တစ်၊ နွားဖြစ်ဆယ့်လေး၊ ဧကေး သိန္ဓ၀၊ ကျွဲ အဋ္ဌနှင့်၊ သံမြသာညောင်း၊ ဥဒေါင်း နှစ်ခါ၊ သာလိကာ သတ္တ၊ ဒွါဒသ ကြက်၊ ၀က်ကား ဆယ့်သုံး၊ ပေါင်းရုံးများစွာ၊----

အထက်ပါ ပုံတွင် တွေ့ရသည့် အတိုင်း အလျားလိုက် ဂဏန်းများ ပေါင်းခြင်းသည် လည်းကောင်း၊ ဒေါင်လိုက် ဂဏန်းများ ပေါင်းခြင်းသည် လည်းကောင်း၊ ထောင့်ဖြတ် ဂဏန်းများ ပေါင်းခြင်း သည် လည်းကောင်း ပေါင်းလဒ်သည် ၃၄ ဖြစ်နေပါ၏။ ထိုမျှ မကသေး၊ ဂဏန်းတစ်လုံး နှင့် အနီးနားရှိ နီးစရာ ၄-လုံးတွဲ ပေါင်းခြင်းသည်လည်း ၃၄ ပင် ဖြစ်နေပါ၏။

ထိုကဲ့သို့သော- အခြားအင်းပေါင်း များစွာ အတွက် သင်္ချာ ဆက်စပ်မှုတို့ကို ညီငယ် မောင်အုပ်စိုး အနေဖြင့် ရှင်းပြထားပြီး ဖြစ်၍- ဤနေရာတွင် အကျယ် မချဲ့လိုတော့ပါ။ သို့သော်- လေးထောင့်ကွက်တွင် ဂဏန်းများ ဟိုရေးဒီရေး လုပ်ထားခြင်းဟု သာမာန် နားလည် ထားသူ တစ်ယောက်သည် သင်္ချာသဘောကို ရှာတွေ့မည် ဆိုပါက- ထိုအင်း၏ အံ့ဘွယ် သဘောတို့ကို သဲလွန်စ ရလာနိုင်ပါသည်။

သင်္ချာပညာ နှင့် အင်းပညာ ဆက်စပ်မှု တစ်ခု ဖြစ်ပါသည်။ ယခု “အဘယ ဇာတက အင်း” အင်းကွက် ပုံစံသည် ၄ x ၄ အမျိုးအစား ဖြစ်၏။

အကယ်၍ စာဖတ်သူသည် သင်္ချာပညာကို ကျွမ်းကျင်သူ တစ်ဦးဖြစ်၍ အင်းကစားခြင်းကို ၀ါသနာ ပါသူ ဖြစ်အံ့- ၁၆ x ၁၆ အမျိုးအစား အင်းမျိုးတစ်ခုကို တည်ဆောက်၍ ရနိုင်မည် ထင်ပါသလား။

ဘင်ဂျမင် ဖရန်ကလင်ကမူ - အင်မတန် ရှုပ်ထွေးသော အင်း ဖြစ်သည့် ၁၆ x ၁၆ အမျိုးအစား အင်းကို ကိုယ်တိုင် တည်ဆောက်ခဲ့သည်။ စာဖတ်သူ သိထားရမည်မှာ လွန်ခဲ့သော ခေတ်များက -ကွန်ပျူတာ နှင့် အင်းချနိုင်ဘို့ အသာထား ဂဏန်းပေါင်းစက်ပင် မရှိသေးသော ဖြစ်သည်ကိုပင် ဖြစ်ပါသည်။ ကွန်ပျူတာ အထောက်အကူ ရှိသော ယခုခေတ်ကာလ တွင်ပင်- ဤသို့သော အင်းမျိုး နောက်တစ်ခု တည်ဆောက် နိုင်ရန် အတွက် အလွန် အချိန်ပေး လုပ်ဆောင်ရမည် ဖြစ်ပါ၏။
ဖေါ်ပြပါ အင်းသည် ဘင်ဂျမင် ဖရန်ကလင် တည်ဆောက်ခဲ့သော အင်းဖြစ်၏။ ထိုအင်း၏ အကြောင်းကို ခရစ်စတိုဖာ ဂျေ ဟန်းနရဇ် Christopher J. Henrich က the American Mathematical Monthly, Vol 98, no 6, 1991 တွင် "Magic Squares and Linear Algebra" ဆောင်းပါးဖြင့် ဖေါ်ပြခဲ့၏။
ယခု ဘင်ဂျမင် ဖရန်ကလင်၏ အင်းတွင်- အလျားလိုက် ဂဏန်းများ ပေါင်းခြင်းသည် လည်းကောင်း၊ ဒေါင်လိုက် ဂဏန်းများ ပေါင်းခြင်းသည် လည်းကောင်း၊ ထောင့်ဖြတ် ဂဏန်းများ ပေါင်းခြင်း သည် လည်းကောင်း ၂၀၅၆ -ရနေယုံမျှ မက- ညာဘက်မှာ ဘယ်ဘက်သို့ ထောင့်ဖြတ် ပေါင်းခြင်းများသည် လည်းကောင်း၊ ဘယ်မှ ညာသို့ ထောင့်ဖြတ် ပေါင်းခြင်းများသည် လည်းကောင်း၊ အထက်မှ အောက်သို့ ထောင့်ဖြတ် ပေါင်းခြင်းများသည် လည်းကောင်း၊ အောက်မှ အထက်သို့ ထောင့်ဖြတ် ပေါင်းခြင်းများသည် လည်းကောင်း - အားလုံးတို့သည် ၂၀၅၆ ဖြစ်နေပါ၏။

အောက်တွင် ဖေါ်ပြထားသည်မှာ အထက်မှ အောက်သို့ ထောင့်ဖြတ်များ ပေါင်းခြင်း နမူနာ တစ်ခုသာ ဖြစ်ပါသေးသည်။




ဖေါ်ပြပါ အင်းပုံစံ နှင့် သရုပ်ဖေါ်ပုံ တို့ကို http://www.math.wichita.edu/~richardson/franklin.html မှ ရယူထားပါသည်။ တစ်ခုချင်း Animation ဖြင့် သရုပ်ဖေါ်သည်ကို ကြည့်လိုပါက- http://www.math.wichita.edu/~richardson/ben-ani.html တွင် ကြည့်နိုင်ပါသည်။

မိတ်ဆွေ- အကယ်၍ တစ်စုံတစ်ဦးသော ပြည်ပ နိုင်ငံသား တစ်ယောက်သည် ဤကဲ့သို့ ထူးခြားသော တီထွင်မှု - ၀ိဇ္ဇာပညာ ရပ်ကို လုပ်ဆောင်နိုင်သည် ဆိုပါအံ့- ထိုသူအား - အားယားနေလို့ တီထွင် နိုင်သည်၊ ငွေကြေး ချမ်းသာ ၍ တီထွင်နိုင်သည်ဟု ဆိုကာ- အထင်မကြီး ပျက်ရယ် ပြုမည် ဆိုလျှင်- အတန်းပညာကို မူလတန်း အထိသာ နေခွင့်ရ၍- ဘ၀ကို ငယ်စဉ်မှ ရုန်းကန်ခဲ့ရကာ- အမေရိကန် သမိုင်းတွင် အထင်ရှားဆုံး နိုင်ငံ့ ဖခင် တစ်ဦးသည်- အားနေမည်၊ အချိန်တွေ ပိုနေမည် ဟု သင်ထင်နိုင်ပါသေးလား။

အဓိပ္ပါယ် မရှိသော အလုပ်ကို ထိုသူ လုပ်မည်ဟု သင်ထင်မြင် မိပါသလား..

ကျွန်တော် မြန်မာလူမျိုးများ အနေဖြင့်- အခြား နိုင်ငံမှ တီထွင်များကို ကြားသိလျှင်- သူတို့က တီထွင်နိုင်မှာပေါ့- စားဝတ်နေရေးက ပူစရာမလိုပဲ ဟူ၍ လည်းကောင်း၊ သူတို့က တီထွင် နိုင်မှာပေါ့- သူတို့ အစိုးရက အားပေးတာပဲ ဟူ၍ လည်းကောင်း- မိမိကိုယ် မိမိ ရှောင်ထွက်ရန် ကြိုးစား နေခြင်း မလုပ်ပဲ- မိမိ ဘာသာ အကောင်းဆုံး ဖြစ်အောင် လုပ်ဆောင်ခြင်းဖြင့်- အကောင်းဆုံး အနေအထား နှင့် တန်သောသူများ ဖြစ်လာပါက- ကံ-ကံ ၏ အကျိုးကို မုချ ခံစားကြရမည်မှာ မလွဲမသွေပင် ဖြစ်ပါသည်။

ချမ်းမြေ့ပါစေ
နျူမာန် (မိုးတား)

[+/-] show/hide this post

No comments:

Post a Comment