Wednesday, May 18, 2011

မြန်မာ နက္ခတ် ပညာရှင်ကြီးများ အယူအဆ။ (၁) (ကောဇာ အယူအဆ)

ဆရာကြီး ပျဉ်းမနား ဦးသန်းမောင်သည် သူ၏ နောက်ဆုံး စာအုပ်ဖြစ်သော ဂေါစရ ဖလ၀ိနိစ္ဆရ ကျမ်း နိဒါန်းတွင် အောက်ပါ အတိုင်း ရေးသား ဖေါ်ပြခဲ့ပါသည်။

“ကျွန်ုပ်ကား ဗေဒင် ကျမ်းပေါင်းများစွာကို ဖတ်ရှု လေ့လာသူ ဖြစ်စေကာမူ စာအုပ်ကြီး အတိုင်း တထစ်ချ ယုံကြည် အားကိုးသူ မဟုတ်ပေ။ သဘာဝ ယုတ္တိရှိလျှက် သိပ္ပံနည်းကျသော ဗေဒင် အယူအဆများ ကိုသာ ဗေဒင် ပညာ၏ အနှစ်သာရ အဖြစ် လက်ခံယူသူ ဖြစ်ရာ-
ဗေဒင်တော်လှန်ရေး သမား အစစ်ပါတည်း
ကျွန်ုပ်ကား သိပ္ပံနှင့် အနီးကပ်ဆုံး၊ သဘာဝ အကျဆုံး ရာနှုန်းပြည့် မှန်ကန်မည့် ဗေဒင်ဟောနည်း ကိုသာ ရှာဖွေခဲ့သူ ဖြစ်ရာ ယခုစာရေးသည့် အချိန် အထိ ကမ္ဘာ့ဗေဒင် ဟောနည်း အမျိုးမျိုးအနက် ကောဇာ ဂြိုဟ်စီး ဂြိုဟ်မြင် ဟောနည်းကိုသာ တွေ့ရသေးသည်။ ထိုထက် ကောင်းသော ဟောနည်းမျိုးမရှိနိုင်ဟု ရေးသားရန် မသင့်ဟု ယူဆသည်။ ၄င်းဟောနည်းကို အကြိုက်ဆုံး ဖြစ်နေသဖြင့် အိန္ဒိယ ဗေဒင်ကျမ်း များတွင် ပါရှိသော ဂေါစရာဖလ ဟောနည်းများကို ဖော်ပြကာ ဝေဘန် ရှင်းပြယင်း၊ အဆုံးအဖြတ် ပေးရန် စတင် ရေးသားနေခြင်း ဖြစ်သည်။ သို့အတွက် ဤကျမ်း၏ အမည်ကို “ဂေါစရ ဖလ၀ိနိစ္ဆရ” ဟု သမုတ် လိုက်သည်။”
(ဆရာကြီး ပျဉ်းမနား ဦးသန်းမောင်၏ နောက်ဆုံး စာအုပ်ဖြစ်သော ဂေါစရ ဖလ၀ိနိစ္ဆရ ကျမ်း နိဒါန်း)

အခြားတစ်ဘက်တွင်-
၁၉၄၈ ခုနှစ်က နက္ခတ်ဗေဒင် မဂ္ဂဇင်းကို ဆရာကြီး ပျဉ်းမနား ဦးသန်းမောင် နှင့် အတူ ထုတ်ဝေခဲ့ပြီး- ၁၉၅၈ ခုနှစ် ဖဆပလ ကွဲသည်နှင့် အတူ ဆန့်ကျင်ဘက် ဖြစ်သွားသော လျှပ်စစ်ဗေဒင် ဦးအုန်းသင်ကမူ- "ကောဇာ ဂြိုဟ်စီး ဂြိုဟ်နင်း ပြဿနာ" ခေါင်းစဉ်ဖြင့် မဏ္ဍိုင် သတင်းစာတွင် အောက်ပါ အတိုင်း ဖေါ်ပြ ရေးသားခဲ့ပါသည်။
"စနေဂြိုဟ် စီးနင်း အတိုင်း မြင်တိုင်း အပြစ်ဖြစ်အံ့ လော၊ စဉ်းစားရန်မှာ လဂ်သည်လည်းကောင်း၊ စန်းသည် လည်းကောင်း၊ အခြားဂြိုဟ်တို့သည် လည်းကောင်း စီးနင်းခံရသော ဂြိုဟ်ဖြစ်စေ၊ ဂြိုဟ်မြင်ခံရသော ဂြိုဟ်ဖြစ်စေ အားရှိခဲ့ကြအံ့၊ ထိုအခါ ဇာတာရှင်သည် မကောင်းကျိုးမပေးစွမ်း နိုင်ဟု ဟောဆိုရပြန်လေသည်။ လဂ်စန်းအားရှိ အားမဲ့ကို သိရှိရန်မှာ ဆဋ္ဌဗလ အားဖြင့် တွက်တတ်ပါမှ နားလည်ပေမည်။ ရိုးရိုးနည်းအားဖြင့် မှန်းဆ ဟောဆိုရန်ကား မမှန်ကန်နိုင်ပေ။အားဗလကို အသေအချာ တွက်စစ်ပြီးမှ ဟောဆိုခြင်း ပြုရပေရာ ကိန်းသေအားဖြင့် မှတ်သားပြီး လဂ်စန်းပေါ်သို့ စီးနင်းတိုင်း အညံ့များကို ချောက်လှန့်၍ မဟောပြောသင့်လှဘဲ ဟောပြောနည်း၏ နည်းလမ်း စနစ်အရ ပြည့်စုံစွာ အစီးအနင်း သက်သက်ဖြင့် မဆုံးဖြတ်ရဘဲလျှက် ဒဿာနည်းပါ ပေါင်းစပ် ဆင်ခြင်ပြီး ဟောဆိုရကြောင်း- ကောဇာ စနေဂြိုဟ်စီး ပြဿနာကို ဖြေရှင်းလိုက်ရပါပေတော့သည်။"
မန္တလေး ဆရာကြီး ဦးကျော်ငြိမ်း (ဘုန်းကြီးဘွဲ့ ဦးကောသလ္လ) ကလည်း သူ၏ “ဝေဒဆီနှစ် ဟောနည်း စစ်ကျမ်း” နိဒါန်း စာမျက်နှာ ၂-တွင် အောက်ပါ အတိုင်း ဝေဘန် ပြထားပါ၏။
“အချို့သော ပညာရှင်များက ကမ္ဘာလုံး ဆိုင်ရာ အသိအမှတ်ပြုထားသော ကမ္ဘာ့လဂ်သုံး ဗေဒင်ကျမ်းကြီး ကျမ်းခိုင် ကျမ်းရင်းများမှ အဖြည့်အစွက် သဘောမျှသာ ပဓာန လိုရင်း မဟုတ်ဟု ညွှန်ကြားထားသော ဂေါစရ ဖလ ကောဇာ ဂြိုဟ်စီး ဂြိုဟ်နင်း အဟောများကို ရေးကြီး ခွင်ကျယ် လုပ်၍ ဇာတာ၏ မူလ ခိုင်မခိုင် စသည်ကို မစစ်ဆေးဘဲ အာဘော် အာရင်း သန်သန်ဖြင့် ဟောပြောနေကြ၏။ ရှိပါစေဦး၊ ဟောပုံ ဟောနည်းမှာလည်း ပါပဂြိုဟ် စီးနင်းလျှင် မကောင်း၊ သောမဂြိုဟ် စီးနင်းလျှင် ကောင်း၏ စသည်ဖြင့် လှေနံဓားထစ် တထစ်ချ မူသေနည်းဖြင့် ဟောပြောနေကြ၏။”

မဟာသုဇာတက ကျမ်း ကောဇာဂြိုဟ်ရောက်ဟော ဂေါစရ ဖလ ပိုင် စာမျက်နှာ ၃၂၀ တွင် အောက်ပါ အတိုင်း နိဂုံးချုပ်ထားသည်ကိုလည်း တွေ့နိုင်သေး၏။
“ဤအဟောသည် အားကြီးသော အဟောမဟုတ်သောကြောင့်- အန္ဓ၀ဂ္ဂ အဟော အာယုဒါယ အဟောတို့နှင့် အစွက်အဖက် လောက်သည် ထည့်၍ ဟော၏ဟု ၀ရဟာ ဟိတိရသံဟိတာ အစရှိသော ကျမ်းတို့၌ ဆို၏။”
ထိုအချက်ကို ကိုးကား၍ “ဝေဒဆီနှစ် ဟောနည်း စစ်ကျမ်း” စာမျက်နှာ် ၁၃၁ တွင် ဆရာကြီး ဦးကျော်ငြိမ်းမှ အောက်ပါ အတိုင်း ဝေဘန် ပြထားပါသည်။
“သို့ရာတွင် ကောဇာ အဟောများအား တွဲဘက် အဟောများသာ ဖြစ်နိုင်ခြင်းကိုကား မမေ့အပ်ပေ။ ၄င်း ကောစရ ဖလများသည် ရံခါ ဇနမ စန်းကြောင့် ပျက်၍ ရံခါ ကောင်းကျိုးတိုးပွားစေတတ်သောကြောင့် တည်း။ ကောဇာ ဂြိုဟ်စီး သက်သက်ကို ဟောခြင်းသည် ဝေဒပညာရှင် အစစ်မဟုတ် ငှားသော ဟောပြောချက်သာ ဖြစ်၏။ ဂေါစရ ဖလကို သေချာစွာလေ့လာပြီး နောက်တွဲဘက် ညွှန်ကြားချက် ကောင်းမကောင်းကိုလည်း စစ်ဆေးရပေမည်။ အားလုံး သုံးခုလုံး စစ်ဆေးခြင်းတွင် အဟောများကို အတည်ပြုထားလျှင် စိတ်ချစွာ ဟောပြောနိုင်သည်ဟု ဆို၏။”
(မှီငြမ်း- ဆရာကြီး ဒေါက်တာဗိုလ်လေး၏ စုဆောင်းလေ့လာချက်ကို မျိုးဆက်သစ် လူငယ်များ သိရှိ စေခြင်းငှာ မျှဝေ ဖေါ်ပြခြင်းသာ ဖြစ်ပါသည်။)

အားလုံး ချမ်းမြေ့ကြပါစေ
နျူမာန် (မိုးတား)

[+/-] show/hide this post

2 comments:

ဟိန်းတင့်ဇော်(ဗလာ) said...

စာလာရောက်ဖတ်ပါတယ်။ ခြေရာလေးတွေ ချန်မထားဖြစ်ပေမယ့် အမြဲ မပြတ် ရောက်ပါကြောင်း....

ခင်မင်လေးစားစွာဖြင့်

ဟိန်းတင့်ဇော်

aungzay py said...

မှတ်သားမိပါသည်

Post a Comment