Thursday, November 18, 2010

စစ် ဧကရာဇ် နပိုလီယံနှင့် ဗေဒင်ပညာ (အပိုင်း ၆)

မှန်ကင်း တစ်လှည့်၊ ထင်း တစ်လှည့်၊
လူသား တို့သည် ပုခက်တွင်း မှ စတင် ကြီးပြင်း လာချိန် ဘ၀ ခရီးအစ မှ သည်၊ သုဿန် သို့ သွားရာ လမ်းခရီး တစ်လျှောက် လုံးတွင် မိမိဘ၀ တိုးတက်ရေး၊ အောင်မြင်ရေး၊ ကြီးပွား ချမ်းသာရေး၊ ဂုဏ်သိက္ခာ၊ သြဇာ အာဏာ ကြီးမားရေး တို့ကို အာရုံစိုက် လုပ်ဆောင် ကြ၏။ သတ္တ၀ါ တို့၏ မူလ ပင်ကိုယ် ဓါတ်ခံ သဘာဝ ဖြစ်သော လောဘ၊ ဒေါသ၊ မောဟ တို့ အနေဖြင့် အရင်းအတိုင်း ကိန်းအောင်း ရှိနေ ခဲ့ကြသည် သာမက- ဘ၀ လမ်းခရီး တစ်လျှောက်တွင် အောင်မြင်မှု တို့ ကို အမှီပြု ဖြစ်ပေါ်လာသော အတ္တ တရား မာန် မာနများ၊ ဆုံးရှုံးမှု တို့ကို မူတည်၍ ဖြစ်ပေါ်သော သောက၊ ပရိဒေ၀၊ ဒေါမနဿ၊ အာဃာတ တရားများကို ကြုံကြိုက်သလို ကောက်ယူ စုဆောင်း သယ်ဆောင် သွားကြယင်း နောက်ဆုံးတွင် သေဆုံး ခြင်းဖြင့်သာ အဆုံးသတ်ကြပါ၏။ စတင် ရှင်သန်သည်မှ နောက်ဆုံး သေဆုံးချိန် အထိ - အရှုံးအမြတ် စာရင်းချုပ် ကြည့်လိုက်ပါမူ- တစ်ကယ် ပိုင်ဆိုင်ရရှိ သွားသည်ကား မိမိ၏ ဘ၀ လမ်းကြောင်းတွင် မိမိ လုပ်ဆောင် ခဲ့သော ကောင်းမှု၊ မကောင်းမှု တို့သာ ဖြစ်၏။

ရှေးကုသိုလ် ကောင်း၍ ဘုန်းတန်ခိုး ကြီးမားခွင့် ရခြင်းဖြင့်- ကောင်းမှုများ လုပ်ဆောင် လိုပါက အောင်မြင်စွာ လုပ်ဆောင်ခွင့် ရသလို- လူအများ၏ ဘ၀ကို အပြောင်း အလဲ ပြုလုပ် ချယ်လှယ်နိုင်ခြင်း၊ နှင့်တကွ လောက အကျိုးတို့၏ ပျက်စီးခြင်း များစွာ တို့ကို လည်း ဖန်တီးနိုင်စွမ်း ရှိပါ၏။

ကံ-ကံ၏ အကျိုးသည်သာ ယုံကြည်စရာ ဖြစ်သဖြင့် - အောင်မြင်ခြင်း တို့သည်လည်း မမြဲ၊ တစ်နေ့တွင် အဆုံးသတ် ရမည်ကို နပိုလီယန်၏ ဇာတာက ညွှန်းဆို ပြသ နေသဖြင့်- ဤဆောင်းပါးသည် နက္ခတ်ဗေဒင် သက်သက် ဝေဘန် သုံးသပ် သော ဗေဒင် ဆောင်းပါး သက်သက်မျှ မဟုတ်ပဲ- စာဖတ်သူများ အနေဖြင့် သံဝေဃ ဥာဏ်၊ ဆင်ခြင် နိုင်ရန် အတွက်ပါ ရည်ရွယ် ရေးသား ထားသော ဆောင်းပါး ဖြစ်ပါသည်။

ဧကရာဇ် မင်းအဖြစ် ဘိသိက်သွန်းခံချိန် စစ်ဆေးချက်။
နပိုလီယန်၏ အထွဋ်အထိပ်သို့ ရောက်ချိန်၊ ဥရောပ တစ်ခွင်တွင် ဘုန်းတန်ခိုး ထင်ရှား၍ ဧကရာဇ် မင်းအဖြစ် ရာဇ ဘိသိက် သွန်းခံချိန် ဇာတာကို မိုးတား နက္ခတ္တ ဝေဒ နည်းဖြင့် ဆန်းစစ်ပြမည် ဖြစ်ပါသည်။

နပိုလီယန် သည် ၁၈၀၄- ခုနှစ်၊ ဒီဇင်ဘာလ ၂-ရက်တွင် မင်းအဖြစ် ဘိသိက်သွန်းခံ ခဲ့သည်။

 အောက်ပါ ဇာတာစက်သည် နပိုလီယန် ၏ မူလဇာတာစက်နှင့် ကောဇာ ဇာတာစက် (ဘိသိက်ခံ နန်းတက်ချိန်) တို့ကို ယှဉ်တွဲဖေါ်ပြထားခြင်း ဖြစ်သည်။

ဆက်လက်၍ အောက်တွင် ဖေါ်ပြထားသော ဂရပ်ဖ်မှာ ကောဇာ ဂြိုဟ်များက မူလ ဂြိုဟ်များ နှင့် အတန့်ဘာဝများ ပေါ်သို့ မည်သို့မည်ပုံ လွှမ်းမိုးနေသည်ကို မိုးတားနည်းစနစ်ဖြင့် သုံးသပ်တွက်ချက် ထားခြင်းဖြစ်သည်။

နောက်တစ်ချက် အနေဖြင့်- နပိုလီယန်၏ တစ်သက်တာ ကံကြမ္မာ အနိမ့်အမြင့်ကို ဒဿာ စနစ်တွင် မိုးတား နည်းစနစ်ဖြင့် သုံးစွဲ၍ ဖေါ်ပြထား၏။



ကောဇာ စစ်ဆေးချက်။
ပထမဦးစွာ- ထိုကာလတွင် ဇာတာရှင်၏ မူလ ဂြိုဟ်နှင့် ဘာဝများအပေါ်တွင် ကောဇာဂြိုဟ်များ၏ လွှမ်းမိုးမှုကို လေ့လာ ရပါမည်။

မကာရ ရာသီတွင် တည်သော မူလ တနင်္လာ အား - ကောဇာ ရာဟုမှ ဒီဂရီ (အံသာ) နီးစပ် စွာလာပူးထား၏။ ထို့ကြောင့်လည်း မူလ တနင်္လာမှာ ကောဇာ ကိတ်၏ အမြင်ကိုပါ ရထားလိုက်၏။ ထို့ကြောင့် မူလ တနင်္လာ အား ကောဇာ ရာဟုနှင့် ကောဇာ ကိတ်တို့၏ လွှမ်းမိုးမှု ထားမှုကို ထင်ရှားစွာ မြင်နေ၏။

ရာဟုနှင့် ကိတ်တို့သည် ထုံးစံအားဖြင့် မကောင်းသော အကျိုးပေးတတ်သော ဂြိုဟ်တို့ဖြစ်ယုံမက- ဤဇာတာ အတွက်လည်း ဂြိုဟ်ဆိုးများ ဖြစ်၏။ သို့သော် ကောဇာ အနေအထားမှ သုံးသပ်ပါက-

ကောဇာ ရာဟု သည် လဂ်မှ ၄-တန့်ဘာဝတွင် တည်၏။ စနေ ပိုင်သော မကာရ ရာသီတွင် တွင် တည်၍ တနင်္ဂနွေပိုင်သော ဥတ္တရာ သဠ် နက္ခတ်နှင့် ယှဉ်၏။ ကောဇာ ကိတ် သည် တနင်္လာ ပိုင်သော ကရကဋ် ရာသီတွင် တည်ကာ- စနေပိုင်သော ဖုသျှ နက္ခတ်နှင့် ယှဉ်၏။ စနေသည် ဤဇာတာ အတွက် ၁၀-တန့်တွင် ရပ်သော ၅-တန့်သခင် ဖြစ်၏။ တနင်္လာ သည် ဤဇာတာ အတွက် ၄-တန့်တွင် ရပ်သော ၁၀-တန့် သခင်ဂြိုဟ်ဖြစ်၏။ အရိပ် ဂြိုဟ်များ ဖြစ်ကြသော ရာဟုနှင့် ကိတ်တို့သည် ၄င်းတို့ ရပ်တည်ရာ ဘာဝ၊ ၄င်းတို့ စီးနင်းသော နက္ခတ်၊ န၀င်းတို့နှင့် ၄င်းတို့အပေါ်တွင် လွှမ်းမိုးသော စရိုက် တို့ကို ရရှိကြသည်။

ထိုသို့သော ကောင်းသော အတန့်သခင်များနှင့် ဆက်စပ်နေသော ကောဇာ ရာဟုနှင့် ကိတ်တို့သည် ထိုဂြိုဟ်တို့၏ စရိုက် သတ္တိများကို ၄င်းတို့လွှမ်းရာ မူလ ဂြိုဟ်များ၊ ဘာဝ များ အပေါ်သို့ သက်ရောက် စေ၏။ သို့သော် ထိုလွှမ်းမိုးမှု ကြာရှည် တည်တန့် ခိုင်မြဲနိုင်ရန်မှာ မူလ ဇာတာတွင် ရှိနေခဲ့သော ရာဟု နှင့် ကိတ် တို့၏ အနေအထား ပေါ်တွင် တည်၏။ တစ်ဖန် ရာဟု နှင့် ကိတ်တို့သည် ပင်ကိုယ် စရိုက်ကိုက ဒုက္ခပေးတတ်သော ဂြိုဟ်များ ဖြစ်ကြသဖြင့် ၄င်းတို့၏ အကူအညီ ဖြင့် ရလာသော ကောင်းကျိုးတို့ သည်လည်း ကြာရှည် မခံတတ်ပေ။

ယာယီ အားဖြင့်- တစ်နည်းအားဖြင့် ဆိုပါက ကောဇာ အနေအထား အရ အဆင်ပြေနေကြသော ရာဟု နှင့် ကိတ်တို့သည် မူလ တနင်္လာကို လွှမ်းမိုးထားခြင်းသည် ရုတ်တစ်ရက် အကြီးအကျယ် အောင်မြင်မှု - ပိုင်ဆိုင်မှု (၄-တန့်)၊ အလုပ် အကိုင် အဆင့် အတန်း မြင့်မားမှု (၁၀-တန့်တို့ကို) အကျိုးပေးစေ၏။

ထူးခြားသည်က ကြာသပတေး-

ဤဇာတာတွင် မူလကပင် ကြာသပတေးသည် အလွန်အင်အားကောင်း၏။ မိုးတား စနစ်အရ- မူလ ဇာတာတွင် အားကောင်းသော ဂြိုဟ်တို့ အနေဖြင့် ကောဇာ ဂြိုဟ်များကလည်း ကောင်းသော အင်အားများ လွှမ်းမိုးချိန်၊ ဒဿာ အရ လည်း ကောင်းသော အနေအထားများ ဖြစ်နေချိန်တို့တွင် ဇာတာရှင် အနေဖြင့် ကောင်းကျိုးကို ထူးခြားစွာ ရရှိတတ်သည်။

ယခုအခါတွင်-
ဇာတာရှင်၏ မူလ ကြာသပတေး အား - ကရကဋ် ရာသီတွင် လာရောက် ရပ်တည်သော ကောဇာ အင်္ဂါမှ ၄-တန့် အမြင်ဖြင့် အတိအကျ နီးပါး အမြင်ပြုထား၏။ အင်္ဂါသည် ဤဇာတာရှင် အတွက် ၁၁-တန့်တွင် တည်သော ၇-တန့် သခင် ဖြစ်၏။ ထို့ကြောင့် ကောင်းကျိုးပြုသော ကာရက ဂြိုဟ်ကောင်း ဖြစ်၏။

ဆက်လက်၍ ဒဿာ အနေအထားကို ကြည့်လိုက်ပါလျှင်-

ရာဟု ထူလ ဒဿာ၊ အင်္ဂါ အန္တရ ဒဿာ၊ ဗုဒ္ဓဟူး ပြတန္တရ ဒဿ ဖြစ်၏။

အဓိက ဇတ်ဆောင် ဖြစ်သော အန္တရ ဒဿာရှင် အင်္ဂါသည်၊ ကြာသပတေးမှ လွဲလျှင် ဒုတိယ အင်အား အကောင်းဆုံး ဂြိုဟ်ဖြစ်၏။ ဂရပ်ပုံတွင် ကြည့်ပါ။

ထို့ကြောင့် ဇာတာရှင်၏ ကံကြမ္မာသည် အမြင့်ပိုင်းတွင် ရှိနေခိုက်၊ ကောဇာ လွှမ်းမိုးမှုများ ကလည်း ကောင်းစွာ တွန်းပို့သော ကြောင့် ဤအနေအထား ကို ရခြင်း ဖြစ်၏။

သို့သော် ကောဇာ အားဖြင့် လည်းကောင်း၊ ဒဿာ အားဖြင့်လည်းကောင်း ရာဟုနှင့် ဆက်စပ် နေသဖြင့် ဤအောင်မြင်မှု သည် ဘ၀ တစ်သက်တာ ထိန်းထားနိုင်သော အောင်မြင်မှု မဖြစ်ခဲ့ရပါ။ လောလောဆယ် စိတ်ကောင်း ၀င်နေသော ရာဟု နှင့် ကိတ် မှ အတိုင်းအတာ ကာလ တစ်ခု အတွက် အကျိုးပြုလိုက်သည် ဟုပင် ဆို၍ ရပါသေးသည်။

ထို့ကြောင့် - လုပ်ငန်း တစ်ခု တည်ထောင်ချိန်၊ မင်္ဂလာ အချိန် အခါ ရွေးချိန်တို့တွင်- ခိုင်ခံ့ တည်ငြိမ်သော ကောင်းမွန်သည့် အချိန် အခါ ရွေးချယ် ခြင်းသည် အလွန်အရေးကြီးသော ကိစ္စရပ် တစ်ခု ဖြစ်သည်။

ဒုက္ခခံစား ရုရှား။
၁၈၁၂-ခုနှစ်၊ ဇွန်လတွင် နပိုလီယန်သည် သူ့အတွက် အကြီးမားဆုံး အမှားကြီးဖြစ်သော ရုရှားနိုင်ငံသို့ ကျူးကျော်ခြင်းကို ပြုခဲ့၏။ သူ၏ အုပ်ချုပ်မှု အောက်တွင် ရှိနေသော ဥရောပ နိုင်ငံတို့မှ စစ်သားပေါင်း ၄-သိန်းကျော်ကို စုစည်း၍၊ ယခင်က သူအောင်မြင်ခဲ့ဘူးသော ရင်ဆိုင်တိုက်ပွဲကြီးများ ကဲ့သို့ အင်ပြည့် အားပြည့် ဆင်နွှဲရန် ရည်ရွယ်၍ ရုရှားသို့ ချီတက်ခဲ့သည်။

သို့သော် ရုရှား ဇာဘုရင် အလက်ဇန္ဒားသည် ပါးနပ်သော နည်းဗျူဟာကို အသုံးချသွား၏။ နပိုလီယန် ၏ တပ်များနှင့် ထိပ်တိုက် ရင်ဆိုင်မည့် အစား- နပိုလီယန်မှ အင်တိုက်အားတိုက် တိုက်မည်ပြုတိုင်း တစ်ဆင့်ချင်း နောက်ဆုတ်သွား၏။ သို့နှင့်ပင် နပိုလီယန်၏ တပ်များသည် ရုရှားအတွင်းသို့ ကျွံသွားခဲ့ရ၏။ သူအမြဲတိုင်း အနိုင်ရနေကြ - အမြန်အဆန် အောင်ပွဲခံသော နည်းစနစ် အတိုင်း ဖြစ်မည် ထင်၍ နပိုလီယန် သည် ရိက္ခာ အထောက်အပံ့ တို့ကို အနည်းငယ်သာ ယူဆောင် လာမိ၏။ သိမ်းပိုက်၍ ရသော နယ်မြေမှ အစားအသောက်တို့ဖြင့် ထုံးစံ အတိုင်း ဆက်လက် ရပ်တည်မည်ဟု သူက စီစဉ် ထားခဲ့ သော်လည်း ရုရှားတို့က နောက်ဆုတ် သွားတိုင်း- နေထိုင်စရာ အဆောက်အဦ၊ စားနပ်ရိက္ခာ၊ သောက်ရေတို့ကို ဖျက်ဆီးသွားခဲ့၍ ရှေ.သို့ ထိုးဝင် သွားတိုင်း ပြာပုံ နှင့်သာ တိုးနေခဲ့ရ၏။ ထိုအစီအစဉ်ကို (scorched earth policy) တနည်းအားဖြင့် - ရန်သူအတွက် ဘာမှ မချန် ပေးထားသော စနစ် ဗျူဟာဟု ခေါ်သည်။ ရုရှားဘုရင်သည် စစ်ကို ဆောင်းတွင်းသို့ ရောက်လာအောင်လည်း စီစဉ်ခဲ့၏။ အချိန်နှင့် ပါတ်ဝန်းကျင် အခြေအနေကို ရုရှားသည် မဟာမိတ် ပြုလိုက်ခြင်း ဖြစ်၏။

သို့နှင့်ပင် ရှေ.တိုးလေ- ဆိုးလေ ဖြစ်ခဲ့ရသော နပိုလီယန်သည် သူလိုချင်သော အဓိက ရင်ဆိုင်တိုက်ပွဲ အနေဖြင့် ၁၈၁၂-ခုနှစ် စက်တင်ဘာလ ၇-ရက်တွင် တစ်ပွဲသာ ဆင်နွှဲ ခွင့်ရခဲ့၏။ ထိုတိုက်ပွဲတွင် အသေအပျောက် စုစုပေါင်း အားဖြင့် လူ တစ်သိန်းကျော် သေခဲ့သော်လည်း မည်သည့်ဘက်ကမှ အနိုင်ရသည့် အနေအထား မရှိခဲ့။

သို့ဖြင့် ၁၈၁၂-ခုနှစ် စက်တင်ဘာလ ၁၄-ရက်တွင် ရုရှားတို့ မီးရှို့ ဖျက်ဆီးပစ်ထားခဲ့သော မော်စကိုမြို့သို့ ၀င်ရောက် နိုင် ခဲ့သည်။ ဆိုးရွား ကြောက်မက်ဘွယ် ကောင်းသော ရုရှား ဆောင်းတွင်း သို့လည်း ရောက်ခဲ့ပြီ ဖြစ်သည်။ ရာသီဥတု ဒဏ်မှ ကာကွယ်ရန် နေစရာ အဆောက်အဦ မရှိ၊ စားသောက်စရာ မရှိ နှင့် ဆိုးရွားသော ရာသီဥတုတွင် နပိုလီယန်၏ တပ်ဖွဲ့ဝင် တို့သည် ၁-သိန်း မျှပင် မကျန်ရစ်တော့ချေ။ ရန်သူ နှင့် တိုက်နိုင် ခိုက်နိုင် အခြေအနေ ရှိသော အရေအတွက်မှာကား တစ်သောင်းမျှပင် ရှိ်တော့၏။

နပိုလီယန်၏ တပ်မကြီးမှာ ပြုတ်ပြုတ်ပြုန်း သွားတော့၏။ အချိန်ကြာလေ ဆိုးလေ ဖြစ်လာ၏။ ဤနေရာတွင် တရုပ် စစ်သူကြီး ဆွန်ဇူး ပြောခဲ့သော သေနင်္ဂဗျူဟာ စစ်ပညာ ကျမ်းမှ အချက်သည် မှန်လှ၏။ အချိန်နှင့် မဟာမိတ် လုပ်ရမည် ဟု ဆွန်ဇူးက ပြောခဲ့၏။ ယခုမူ အချိန် သည် နပိုလီယန်၏ ရန်သူ ဖြစ်၍၊ ရုရှားအတွက် မိတ်ဆွေ ဖြစ်နေပြီ ဖြစ်သည်။

အောက်တိုဘာလ တွင် ပြင်သစ် ပြည် နောက်တန်း၌ လည်း ပြဿနာတို့ တက်နေ၏။ နပိုလီယန် ရုရှားတွင်ပင် သေဆုံးသွားပြီ ဆိုသော ကောဠာ ဟဠ များကြောင့် အာဏာသိမ်းမည့် ကိစ္စများလည်း ပေါ်ပေါက်နေ၏။ ထို့ကြောင့် နပိုလီယန် သည် ဒီဇင်ဘာလ ၅-ရက် ၁၈၁၂ တွင် ပြင်သစ် ပြည်သို့ အမြန် ပြန်ဆုတ်ရန် စီစဉ်ရတော့သည်။

ဒဿာ စနစ်အရ ကံကြမ္မာ သုံးသပ်ချက် အနေအထားအရ..

၂၄-၄-၁၈၁၂ မှ ၃၁-၃-၁၈၁၃ တိုင်အောင် ကိတ် အန္တရ ဒဿာ စားနေ၏။ လောကီ စည်းစိမ် အောင်မြင်မှုတို့ကို ဖျက်ဆီးသော ကိတ်သည် နပိုလီယန် အား ကြီးမားသော ဆုံးရှုံးမှုကို ဖြစ်စေ၏။ ရုရှားတွင် အထိနာခဲ့သော နပိုလီယန် အား- ထို အခွင့်ကောင်းကို ယူ၍ ပရပ်ရှား စသော အခြား ဥရောပ နိုင်ငံများက စစ်ကြေညာ တိုက်ခိုက်ပါတော့သည်။ နပိုလီယန်၏ ကံကြမ္မာ ဂရပ်ကို အောက်တွင် ကြည့်ပါ။

ထို့နောက်တွင်တော့ နန်းစွန့်ခဲ့ရခြင်း၊ တစ်ဖန် ပြန်လည်၍ ဧကရာဇ် အဖြစ် ပြန်ရောက်ပြီးကာမှ အင်္ဂလန် နိုင်ငံ ၀ယ်လင်တန် နယ်စားကြီး နှင့် ၀ါတာလူး စစ်ပွဲတွင် ရှုံးနိမ့်ခဲ့ရပြီးနောက် စိန့်ဟယ်လီနာ ကျွန်းတွင် တစ်ကျွန်းစံ အကျဉ်းကျ ဧကရာဇ် အဖြစ်ဖြင့် ဘ၀၏ နောက်ဆုံး အချိန်ကို ကုန်လွန်စေခဲ့ရပါတော့သည်။
နပိုလီယန်၏ နောက်ဆုံး စစ်ပွဲကြီး။
ရုရှားတွင် အကြီးအကျယ် အထိနာခဲ့ရသော နပိုလီယန်သည် နန်းစွန့်ခဲ့ရပြီးမှ တစ်ဖန် ပြန်လည် အာဏာ ရလာခဲ့သော်လည်း သူ၏ ဘ၀ကို လုံးဝ ပြောင်းလဲသွားစေသည်က ၀ါတာလူး စစ်ပွဲကြီး ဖြစ်၏။ ၀ါတာလူး စစ်ပွဲကြီးသည် ၁၈၁၅-ခုနှစ်၊ ဇွန်လ ၁၈-ရက်၊ တနင်္ဂနွေ နေ့တွင်၊ အင်္ဂလန် နိုင်ငံ ၀ယ်လင်တန် နယ်စားကြီး နှင့် တိုက်ခိုက်ခဲ့ရသော နောက်ဆုံး စစ်ပွဲကြီးဖြစ်၏။ အောက်တွင် ဖေါ်ပြထားသည်က ထိုစစ်ကြီးဖြစ်သော နေ့တွင် ကောဇာ ဇာတာခွင် နှင့် မူလ ဇာတာခွင် တို့နှင့် တကွ- ကောဇာ ဂြိုဟ်များမှ မူလ ဇာတာရှိ ဂြိုဟ်များ၊ ဘာဝများကို လွှမ်းမိုး နေခြင်းကို ပြထားခြင်း ဖြစ်သည်။


ဒဿာ အနေအထားရ စစ်ဆေးလိုက်ပါက-ထိုကာလ တွင် ကြာသပတေး- သောကြာ- ဗုဒ္ဓဟူး ဒဿာ စားနေ၏။ ဒဿာ အဟော တစ်ခုတည်း ဆိုပါက- အင်အားကောင်းသော ကြာသပတေး အနေဖြင့် ထူလ ဒဿာ- လဂ်သခင် လည်းဖြစ်၊ အင်အား လည်း ရှိသော သောကြာ အန္တရဒဿာ ကာလတွင် ဇာတာရှင် အနေဖြင့် ကောင်းစားရမည် ဖြစ်သည်။

အမှန်အားဖြင့်လည်း - ယခု အချိန် အထိ ကောင်းစား နေပါသည်။ သို့သော် စစ်နိုင်ခြင်း၊ စစ်ရှုံးခြင်း အတွက်မူ- ကောဇာ ကိုလည်း တစ်ဘက်မှ စစ်ဆေးရမည် ဖြစ်၏။
ကောဇာ စစ်ဆေးမှု မါပါပဲ- ဒဿာ တစ်မျိုးတည်း ဟောပြောလျှင် ဖြစ်စေ၊ ဒဿာ စစ်ဆေးမှု မပါပဲ ကောဇာ စစ်ဆေးမှု တစ်ခုတည်းဖြင့် ဟောပြောလျှင် ဖြစ်စေ- တစ်ဘက်ကန်း ဟောနည်း ဖြစ်သည်  
ဟု ရှေးပညာရှင်များက သင်ကြား ထားခဲ့ ပါသည်။ ဘ၀ တစ်သက်တာ အတွက် အရေးကြီးသော ကိစ္စရပ်များ ဆောင်ရွက်ရာတွင်- တစ်ဘက်တည်း၊ တစ်နည်းကောင်းကိုသာ ကြည့်၍ အချိန်ရွေးခြင်းသည် မမှန်ကန်ကြောင်းကို ဤဇာတာကလည်း သက်သေခံ နေပါတော့သည်။ လက်အောက် ငယ်သားများ၏ အသက်ပေါင်းများစွာ ကို အရင်း အနှီးပြု၍- ခေါင်းဆောင်တို့ စစ်ထိုးခြင်းတွင် ထိုခေါင်းဆောင် အနေဖြင့် ကံဆိုးမှု အနည်းငယ်ကပင် ထိုစစ်ပွဲကြီး၏ အဆုံး အဖြတ် ဖြစ်သွားနိုင်ပါသည်။

ဇာတာရှင်၏ လဂ်သခင်ဖြစ်သော သောကြာဂြိုဟ်သည် ကောဇာ ရာဟုနှင့် ကိတ်တို့၏ လွှမ်းမိုး ဖျက်ဆီး မှုဒဏ် ကို အခြေအနေ ဆိုးဝါးစွာ ခံနေရပါသည်။ အောက်ပါ ဂရပ်ဖ်တွင် ကြည့်ပါ။
တစ်ဖန်- မူလ ဘွားဇာတာ တွင် တည်ခဲ့သော ရာဟု၊ ကိတ် ကို ဆက်ဆွဲသော မျဉ်းနှင့် ယခု ကောဇာ ဇာတာတွင် ကိတ်၊ ရာဟု ဆက်ဆွဲသော မျဉ်းတို့သည် တစ်တန်းတည်း ဖြစ်နေပါသည်။

ကောဇာ ရာဟုသည်- ၄င်းရာဟုပိုင် နက္ခတ်ဖြစ်သော အဒြ နက္ခတ်ကို စီးနင်းထားသလို၊ ကောဇာ ကိတ်သည်လည်း ကိတ်ပိုင် သော မူလ နက္ခတ်ကို စီးနင်းထားပါသည်။ ရလဒ်မှာ - ရာဟုနှင့် ကိတ်တို့၏ ဖျက်ဆီးတတ်သော စွမ်းအား ပိုထင်ရှားနေခြင်း ဖြစ်၏။

ထိုမျှ မကသေးပါ- အလွန်အရေးကြီးသော အချက်များ ကျန်နေပါသေးသည်။

ကောဇာ ရာဟုနှင့် ကိတ်တို့သည် အံသာအားဖြင့် ဘာဝတို့၏ ဗဟိုမှတ် အံသာနှင့် နီးစပ်နေပါ၏။ ထို့ကြောင့်- ကောဇာ ရာဟုနှင့် ကိတ် တို့ - ၂-ခုပူးပေါင်းသော အဖျက်အင်အားသည် နပိုလီယန်၏ ၃-တန့်ဘာဝ နှင့် ၉-တန့်ဘာဝ တို့၏ အလယ်မှတ် နေရာများကို လည်းကောင်း၊ ကောဇာ ရာဟု တစ်ခုတည်း အနေဖြင့် လဂ်နှင့် ၅-တန့်ဘာဝ ကိုလည်းကောင်း၊ ကောဇာ ကိတ်တစ်ခုတည်း အနေဖြင့် ၇-တန့်နှင့် ၁၁-တန့်ကို လည်းကောင်း ဖျက်ဆီးထားပါသည်။

အတန့်ဘာဝများ အားလုံးလို ပျက်စီးသွားသော အနေအထားတွင် ဖြစ်နေခြင်း ဖြင့်၊ ထိုအတန့်ဘာဝ ကို ပိုင်ဆိုင်သော သခင် ဂြိုဟ်တို့၏ အင်အားမှာလည်း ပျက်သုဉ်းသော အခြေအနေ သို့ရောက် သွားပါတော့၏။



နပိုလီယန်၏ ဘ၀ သုံးသပ်ချက်။
နပိုလီယန်သည် လူသား တစ်ယောက် ဖြစ်၏။ သူအနေဖြင့် လူကောင်း ဖြစ်သည်လော- လူဆိုးဖြစ်သည် လော ဆိုသည်မှာ သမိုင်း နှင့် နောက်လူတို့ အနေဖြင့် ကိုယ်ကြိုက်သလို သတ်မှတ်နိုင်၏။

မည်သို့ပင် ဖြစ်စေ- သူသည် ရည်ရွယ်ချက် ကြီးမားခဲ့၏။ လုပ်လိုသော ကိစ္စများကို အောင်မြင်အောင် လုပ်နိုင်ခဲ့သူ ယောက်ျားထူး တစ်ဦး ဖြစ်၏။

အထက်တွင် ဖေါ်ပြခဲ့သည့် အတိုင်း-
  • သို့သော်- နိမ့်တုံ- မြင့်တုံ လောကဓံ၏ ရိုက်ပုတ်ခြင်းကို သူ့အနေဖြင့် ကြီးမားစွာ ခံခဲ့ရ၏။
  • အောင်မြင်မှု ကို ရယူနိုင်ရေး အတွက် ပေးဆပ်ခဲ့ရ၏။
  • ထိုကဲ့သို့- ရခဲ့သော အောင်မြင်မှုသည်လည်း ထာဝရ မြဲပါသလော။
  • အမြင့်သို့ တက်နိုင်သမျှ တက်ခဲ့သော် ကျဆုံးခြင်းတို့သည် ပြင်းထန်လှ၏။
  • ဧကရာဇ် တစ်ပါး အဖြစ်မှ အကျဉ်းသား ဘ၀ ဖြင့် ဘ၀မှာ အဆုံးသတ်ခဲ့၏။
  • သူအနေဖြင့်- တန်ရာ တန်ဘိုးများ ရခဲ့ပါသလော..
 စာရှုသူတို့ သုံးသပ်ရန်သာ ဖြစ်ပါသည်။

  
ချမ်းမြေ့ပါစေ။
နျူမာန် (မိုးတား)

[+/-] show/hide this post

No comments:

Post a Comment